Jer 27 | NdeIBE | STEP | Ekuqaleni kokubusa kukaZedekhiya indodana kaJosiya inkosi yakoJuda, ilizwi leli lafika kuJeremiya livela kuJehova lisithi:

Jeremiah 27

UJuda uzasebenzela uNebhukhadinezari

1 Ekuqaleni kokubusa kukaZedekhiya indodana kaJosiya inkosi yakoJuda, ilizwi leli lafika kuJeremiya livela kuJehova lisithi:

2 UJehova wathi kimi, “Yenza ijogwe ngemichilo langemigoqo uligaxe entanyeni yakho.

3 Ubusuthumela ilizwi enkosini yase-Edomi, leyaseMowabi, leyase-Amoni, eyeThire kanye leyaseSidoni ngezithunywa ezize eJerusalema kuZedekhiya inkosi yakoJuda. 4 Zinike ilizwi eliya emakhosini azo uthi, ‘UJehova uSomandla, uNkulunkulu ka-Israyeli uthi: “Tshelani amakhosi enu lokhu ukuthi: 5 Ngamandla ami amakhulu langengalo yami eyeluliweyo ngenza umhlaba labantu bawo kanye lezinyamazana ezikuwo, njalo ngiwunika loba ngubani ngokuthanda kwami. 6 Khathesi wonke amazwe enu ngizawanikela encekwini yami uNebhukhadinezari inkosi yaseBhabhiloni, ngizakwenza lezinyamazana zeganga zibe ngaphansi kwakhe. 7 Izizwe zonke zizamsebenzela yena lamadodana akhe kanye labazukulu bakhe kuze kufike isikhathi selizwe lakhe lapho azanqotshwa khona yizizwe ezinengi lamakhosi amakhulu.

8 “ ‘ “Kodwa, loba yisiphi isizwe loba umbuso ongasebenzeli uNebhukhadinezari inkosi yaseBhabhiloni loba ukhothamisele intamo yawo ejogweni lakhe, ngizasijezisa lesosizwe ngenkemba, ngendlala langesifo, ngize ngiwuchithe ngesandla sakhe, kutsho uJehova.

9 Ngakho lingabalaleli abaphrofethi benu, izanusi zenu, abachazi bamaphupho, izangoma zenu loba izinyanga zenu ezithi kini, ‘Kaliyikuyisebenzela inkosi yaseBhabhiloni.’

10 Baphrofetha amanga kini azasebenza ukulisusa nje kuphela emazweni enu; ngizalixotsha njalo lizabhubha. 11 Kodwa isizwe esizabeka intamo yaso ngaphansi kwejogwe lenkosi yaseBhabhiloni siyisebenzele, lesosizwe ngizasiyekela siselizweni laso ukuba sililime njalo sihlale kulo, kutsho uJehova.” ’ ”

12 UZedekhiya inkosi yakoJuda ngamnika ilizwi elinjalo; Ngathi, “Beka intamo yakho ngaphansi kwejogwe lenkosi yaseBhabhiloni; isebenzele yona kanye labantu bayo, uzaphila. 13 Kungani wena labantu bakho lizabulalwa ngenkemba, indlala lesifo uJehova ayesongele ngakho isizwe esingayikusebenzela inkosi yaseBhabhiloni na?

14 Lingawalaleli amazwi abaphrofethi abathi kini, ‘Kaliyikuyisebenzela inkosi yaseBhabhiloni,’ ngoba baphrofetha amanga kini. 15 ‘Angibathumanga,’ kutsho uJehova. ‘Baphrofetha amanga ngebizo lami. Ngakho ngizalixotsha, libhubhe lina kanye labaphrofethi abaphrofetha kini.’ ”

16 Ngasengisithi kubaphristi lakubo bonke abantu laba, “UJehova uthi: Lingabalaleli abaphrofethi abathi, ‘Masinyane nje izitsha zasendlini kaJehova zizabuyiswa zivela eBhabhiloni.’ Baphrofetha amanga kini. 17 Lingabalaleli. Isebenzeleni inkosi yaseBhabhiloni, lizaphila. Kungani idolobho leli kumele libe lunxiwa na?

18 Uma bengabaphrofethi njalo belelizwi likaJehova, kabamncenge uJehova uSomandla ukuba imihlobiso eseleyo endlini kaJehova lasesigodlweni senkosi yakoJuda kanye laseJerusalema ingasiwa eBhabhiloni. 19 Ngoba lokhu yikho okutshiwo nguJehova uSomandla mayelana lezinsika, langoLwandle, lokokumisa okuphakamisekayo kanye leminye imihlobiso eseleyo kulelidolobho, 20 uNebhukhadinezari inkosi yaseBhabhiloni engahambanga layo ekuthatheni kwakhe uJehoyakhini indodana kaJehoyakhimi inkosi yakoJuda emsusa eJerusalema emusa ekuthunjweni eBhabhiloni, kanye lezikhulu zonke zakoJuda lezeJerusalema – 21 yebo, lokhu yikho okutshiwo nguJehova uSomandla, uNkulunkulu ka-Israyeli, mayelana lezinto eziseleyo endlini kaJehova lasesigodlweni senkosi yakoJuda kanye laseJerusalema ukuthi: 22 ‘Zizasiwa eBhabhiloni lapho ezizakuba khona kuze kufike usuku engizazilanda ngalo,’ kutsho uJehova. ‘Laphoke ngizazibuyisela emuva kule indawo.’ ”